Kommande laurdag 17.juni kl.16:00 (Merk tida) er det Gubbenes Mester 2017. Etterkvart er dette blitt ein fin tradisjon som markèrer at årets første treningstermin er over. Som vanleg vil vi bli testa på eit utval uvande øvingar som komitèen har funne på. Og komitèen i år er Roald og Ola.
Etter den økta vankar det premiering for flest frammøte m.v. Så fyrer Roald opp grillen for ein matbit og drikke. Sistnemnde tek du med sjølv. Så held vi på så lenge vi ynskjer.
VEL MØTT!
Tradisjonen tru: Siste laurdag før jul er det høgtideleg avslutning av haustsemesteret 2016! Som vanleg diskar Roald opp i garasjen med god mat og god drikke (gløgg). Her vert det songe julesongar og vi har premieutdelingar av ulikt slag!
Frammøte som vanleg kl. 17:00 for ei litt kortare treningsøkt enn vanleg (30min), før vi benkar oss til bords. Ta med tørre varme klede å ta på, og drikke til eige forbruk.
Og som vanleg: Sei frå heime at du vert seinare enn vanleg, så ingen vert etterlyst!
VELKOMMEN!!!
Årsmøtet i Gubbetrimmen 2016 vert halde på Fretheim Hotell i Flåm laurdag 15.oktober. Innmelding av saker vert å sende sjefstrenar frå no og fram til møtet startar!
Før årsmøtet legg ein opp til deltaking på Galdane Rundt. Dette kan du lese meir om her:
https://www.facebook.com/galdanerundt/
Ta gjerne med deg kone/mann/partnar også. Her er både konkurranse- og mosjonsklasse.
Etter årsmøtet vert felles middag!
Då nærmar hausten seg og mange av oss er klar til å møtast til gode økter på vegane rundt Vassenden. Roald har avkryssingslista klar – som vanleg sortert etter frammøte førre semester.
Så kl. 17:00 kommande laurdag er det berre å komme. Vi er veldig glade i nye fjes, så vi oppmodar alle å ta med seg ein venn eller venninne som du trur kunne like å vere med på dette!
VEL MØTT!!!
Heldigvis har vi Roald som «piskar» på og arrangerer GM! Då er det opptil oss andre å møte og gjere vårt beste! Kommande laurdag har Gubbetrimmen internt kåringsjå! 3 øvingar ventar og etterpå vert det grilling med tilbehør på Juklestad Brygge. OBS! Hugs frammøte er kl. 16:00!
Vel møtt!!!
Årets innandørs-meisterskap for veteranane gjekk føre seg 12.-13.mars i Nes Arèna ikkje langt frå Jessheim. Gubbetrimmen hadde 3 representantar på plass: Kjell S, Kjell N og Johnny. Alle sprang dei same distansane og alle kom heim med 2 medaljar kvar. Sjølv om nokre var åleine i klassen, var det solide prestasjonar.
Vi startar med Kjell Steinset. Han er no oppe i ny klasse – 80-84år. Etter ein god treningsvinter var det kjekt å sjå kor god han no er. Han knuste gjeldane norske rekordar med 47 sek (1500m) og 23 sek (800m)!! Elles held Kjell N på å ta over trona i Norge i si årsklasse på desse distansane med solide løp som gav gull og sølv. Johnny fekk det same og var nøgd ut frå korleis treningsvinteren har vore for han.
1500m:
Johnny Solheimsnes MV55-59 5.18.48 (2)
Kjell Navelsaker MV60-64 5.04.45 (2)
Kjell Steinset MV80-84 6.30.46 (1) NORSK REKORD!
800m:
Johnny Solheimsnes MV55-59 2.28.19 (1)
Kjell Navelsaker MV60-64 2.26.22 (1)
Kjell Steinset MV80-84 3.04.60 (1) NORSK REKORD!
Eit nytt år er her og vi må i gang med treningane igjen! Det er ingen tid å tape så vi trør i gang alt i dag! Så for å få kryss på lista møter du ved «Garasje Grønfur» kl. 17:00. Vel møtt!
Hei alle!
Siste laurdag før jul – som i år er 19.des – vert det juleavslutning i «Roalds Garage». Med såpass dårleg frammøte som det har vore i haust, lurer vi på om nokon kjem… Vi trur det trass dette vert ein del, men for at verten skal få oversikten er det bra om du melder tilbake til han eller sjefstrenar om det….
Hei alle!
Gubbetrimmens årsmøte for 2015 vert i år halde i Lærdal. … Ja, du leste rett! Planen er som følgjer:
Vi reiser til Lærdal laurdag 24.oktober og deltek på det flotte løpet «Galdane Rundt». Her ser du ein artikkel frå før løpet i fjor:
http://www.kondis.no/galdane-rundt-kongevegloep-i-laerdal-18-oktober.5575089-127676.html
Om kvelden vert det så mat og sosialt samver – og årsmøte! Vi legg opp til å leige campinghytter eller liknande. Vår lokale guide Rune Dvergsdal deltek også,,,Det er også høve å ta med sin «bedre halvdel» om det skulle passe….
Er dette noko du har lyst å vere med på? Meld deg her eller send påmelding til sjefstrenaren før 1.okt.
Då å slutte ikkje er noko alternativ, er alle einige om at vi tek ein ny sesong. Oppstart for denne er laurdag 22.august. Som vanleg er oppmøte/frammøte ved «Garasje Grønfur» kl. 17:00.
Som eit ledd i vervekampanjen ber vi om at alle legg innsats i å få med minst ein ny «gubbe».
Då seier vi berre velkommen og KØYR!!!